Humidal protexido Complexo intermareal Umia - O Grove

O complexo intermareal de Umia - O Grove, A Lanzada, punta Carreirón e lagoa Bodeira está situado entre as rías de Arousa e de Pontevedra, está constituído por tres sectores ben diferenciados:

• A enseada do Grove e o estuario do río Umia, conformado por unha baía protexida, pouco profunda e con amplas superficies intermareais lamacentas ou bancos de area colonizadas por prados de cebado (Zostera marina e Zostera noltii), separadas do mar aberto por un tómbolo formado por areais e dunas. Na desembocadura do río Umia aparecen áreas reducidas de marisma.
• Sistema dunar da praia de Mexiloeira e a lagoa litoral lagoa Bodeira, no norte da península de O Grove
• Illotes rochosos e areosos e sección de costa baixa no sur da Illa de Arousa e os seus arredores (O Carreirón, illotes Guidoiros e illa de Rúa).

En todos os sectores están moi ben representados os sistemas dunares e as zonas húmidas de trasduna. Destaca a praia da Lanzada (3,5km) e o seu sistema dunar asociado. Estas dunas están inzadas de charcas e poceiras temporais semipermanentes , en boa parte poboadas por vexetación helofítica, que tamén aparecen nos arredores nas zonas húmidas de auga doce da lagoa Bodeira, as pozas de Carreirón (Illa de Arousa)  e as lagoas e pozas naturalizadas de Rouxique, no contorno da enseada do Bao, produto de antigas extracción de arxila, que son fundamentalmente espadanas (Typha sp.) e en menor cantidades carrizos (Phragmites australis) e xunqueiras de lagoa (Scirpus sp) na Lanzada, Noalla, A Bodeira e O Carreirón. 

Na parte sur do istmo hai xunqueira salinas e unha extensa zona húmida ocupada por espadaneiras e ameneirais pantanosos (Rego dos Mouros, Noalla).

Na parte máis interior de toda a costa aparece algún piñeiral, mato e terras de cultivo.

Ir ao mapa de espazos protexidos

Contacto e créditos