Sección vexetais
Ciclo de vida e estrutura.
Estrutura dos cormófitos
Animación coa estrutura do cormófito.
Ciclo de vida do cormófito
O esporófito do cormófito desenvolve, no interior dunhas estruturas especializadas chamadas flores, xeralmente hermafroditas, as microsporas masculinas nas anteras e a macroespora feminina no interior do pistilo. A xerminación das esporas produce uns gametófitos moi pequenos.
Os gametófitos masculinos son numerosos e se atopan no interior dos grans de pole mentres que so aparecen 1 ou poucos gametófitos femininos que permanecen no interior do pistilo, dentro do espazo ocupado antes pola macrospora; nese ambiente aparecerá un óvulo por gametófito.
Antes de que se produza a fecundación ten que suceder a polinización, isto é a achega dos grans de pole que conteñen os gametófitos masculinos ao extremo do pistilo. A evolución deu lugar a distintas posibilidades de polinización, polo vento, mediante insectos, ...
Unha vez que o gran de pole está no extremo do pistilo, o gametófito masculino alárgase en forma de tubo levando dous núcleos que van facer a función dos espermatozoides cando cheguen ao óvulo. A fecundación do óvulo dá lugar a unha serie de transformacións que “enquistan” o embrión ata que se dean as condicións adecuadas para a xerminación e crecemento dunha nova planta.
O “quiste” que se forma é o que coñecemos co nome de semente, formada pola cuberta do macroesporanxio, tecido nutricio e o embrión da futura planta.
Se externamente a semente está ou non recuberta de froito falaremos de dous tipos de cormófitos diferentes:
- Ximnospermas: sen froito, coma todas as coníferas.
- Anxiospermas: con froito e moitas con flores hermafroditas. O froito deriva de modificacións da parte baixa do pistilo, aínda que en ocasións poden formar parte del o pedúnculo, a corola, o cáliz ou inflorescencias (conxuntos de flores).