Tipos de hábitats matos: zona atlántica
O cuadrante que vai desde as Serras da Dorsal Galega ata o océano Atlántico, entre ría de Ares e Betanzos e a desembocadura do río Miño; caracterízase por unhas condicións climáticas particulares que vense claramente reflexadas na vexetación particular que se desenvolve nesta zona.
- Por baixo dos 1000 m, sobre solos silíceos, de pobres a moderadamente ricos en nutrientes, en xeral profundos e con bo humus, desenvólvense as xesteiras de Cytisus striatus, unha leguminosa caracterizada polas súas flores amarelas e froitos brancos-verdellos, que vai acompañada do toxo común, a xesta negra e o codeso*, este último nas zonas de antigos pastos ou cultivos (probablemente por exceso de nitróxeno). Esta xesteira indícanos un solo preparado para a rexeneración dos bosques pola súa profundidade e estrutura. Estes bosques serían de carballo, unha especie que debeu ser moi abuntante antano en toda a fachada atlántica pero que viu reducido o seu hábitat grandemente a causa dos asentametos humanos e as explotacións agrogandeiras.
*(Adenocarpus complicatus) - Nas áreas máis chuviosas dos relevos próximos á costa, sobre solos ben desenvolvidos, aparece a toxeira coa carroucha Erica ciliaris, cuxas especies características son o toxo Ulex gallii,máis ao norte ou o U. minor, máis ao sur. No sur esta toxeira busca refuxio nas zonas de solos máis frescos. A carroucha indícanos áreas chuviosas e solos profundos.
- Nos ambientes máis termófilos e oceánicos, por baixo dos 500m na costa coruñesa e na provincia de Pontevedra mestúranse plantas das toxeiras coma Ulex europaeus, Erica cinerea ou Agrostis curtisii con pequenas matos termófilos de carpaza Cistus psilosepalus e garduñas (Genista triachanthos), que ascenden incluso polos vales dos grandes ríos como o Miño ou o Ulla.
A carpaza forma parte dos matos de substitución das carballeiras con sobreiras no litoral atlántico e dos aciñeirais con sobreiras das partes máis mediterráneas. - Por último no litoral costeiro acantilado atópase a toxeira de cantil.
Voltar ao mapa dos tipos de hábitats matos
Hábitats matos: Que é? | Tipos | Factores | Formación | Enlaces