Tipos de hábitats matos: prebosques mediterráneos
Distinguimos dous tipos de prebosque mediterráneo, os erbedais e os louredos, ámbolos dous independentes do tipo de solo.
- Os erbedais son matos dominados polo érbedo, especie termófila de orixe mediterráneo. Nos erbedais aparecen outras matos de porte case arbóreo ou arbóreo na súa madurez coma a uz mediterránea Erica scoparia, o escornacabras ou a lentella. Distribúense nas escasas zonas de Galicia que podemos dicir que teñen un clima máis mediterráneo, que se reducen á conca oriental do río Sil, incluíndo as partes baixas do seus afluentes, entre os 400 e 800m aproximadamente.
- Non obstante hai erbedais sen as especies acompañantes mediterráneas en zonas cálidas litorais ou prelitoriais de toda Galicia, desde o sur de Pontevedra ata a Mariña lucense. Ademais favorecidos pola topografía e exposición solaina localízanse pequenas manifestacións polos grandes vales fluvias, como o do Miño, Ulla ou Navia. Os louredos seguirían unha distribución bioxeográfica similar.
Así pois os érbedos e loureiros son unhas interesantísimas especies que nos evocan a tempos doutros climas máis cálidos en Galicia. Parece evidente que a orixe destes prebosques estivo na expansión da vexetación mediterránea nun pasado non moi lonxano e que o posterior cambio climático fixo que soamente en determinados refuxios favorables se conservaran estas pequenas árbores. Asemade, as pequenas manifestacións costeiras representan unha proba do que foron as migracións de vexetación a través de Galicia, polo que debería reivindicarse a súa conservación.
Voltar ao mapa dos tipos de hábitats matos
Hábitats matos: Que é? | Tipos | Factores | Formación | Enlaces