2. jarduera
PROBLEMAK NOLA EBATZI, ZATIKI KONTZEPTUA ERABILIZ
Dagoeneko badituzu zatikiei buruzko oinarrizko zenbait ezagutza, eta, beraz, ereiteko lursaila nola banatu
beharko duen aholka diezaiokezu baserritarrari.
Jarduera honetarako txosten bat egin beharko duzue testu-prozesadorea erabiliz, eta atal bakoitzaren erantzunak
idatzi. Ez ahaztu izenburua eta azpitituluak idaztea, informazioa antolatzeko.
Erabili irakasleak adierazitako softwarea Jokinen lursailaren eskema bat egiteko (eskalan). Kontuan izan behar duzue Jokinen
lursaila laukizuzena dela, eta 300 metroko luzera eta 200 metroko zabalera dituela.
Ingeniariek plan bat landu dute ahalik eta ondoen ereiteko, eta jarraibide batzuk utzi dituzte. Kontuan izan dute labore
bakoitzaren emankortasuna, eta lursailaren 3/12ean artoa ereitea gomendatzen dute, 1/12ean erremolatxa eta erdian sagarrondoak.
- Egin eskema bat, eta adierazi zer zati hartuko duen labore bakoitzak lursailean. Nahi baduzue, margotu zatiak koloretan
eta idatzi ereingo den laborearen izena.
- Azaldu zer estrategia erabili duzuen lursaila banatzeko.
- Laboreen banaketarako egin duzuen eskema beste ikasleek egindakoaren berdina al da? Zer esango zenioke Jokini laboreak
zure moduan bana ditzan? Zergatik da zure diseinua aukerarik onena?
- Zein zatikik adierazten du sagarrondoak ereindako lursaila?
- Aipatu emandako erantzunaren beste hiru zatiki baliokide. Azaldu nola kalkulatu dituzuen zatiki baliokideak.
- Ingeniariek utzi dituzten xehetasunak kontuan hartuta, erein al da lursail guztia? Erantzuna ezezkoa bada, lursaileko
zein zati ez da erein? Lursailaren zein zati erein da?
Jarduera gehigarri gisa, bilatu espezieen izen zientifikoak Interneten.
Biologian, landare baten izen zientifikoa bi hitzek osatzen dute: generoaren izenak eta espeziearenak.
Bien konbinazioa da landarea identifikatzeko erabiltzen den izen zientifikoa, izena eta abizena izango balitu bezala. Adibidez,
arbendolondoaren izen zientifikoa Prunus dulcis da; hau da, prunus generoa eta dulcis espeziea.
Horrenbestez, bilatu landareei buruzko informazioa eta jaso zuen txostenean.
Ingeniariek pentsatu dute agian Jokin ez dela lursail banaketarekin ados egongo, eta beste irtenbide batzuk eman nahi dizkiote,
beste zenbait espezie erabiliz. Horrela, bost espezie jarri dituzte aukeran, eta zuk zehaztu behar duzu lursaileko zein zatitan
erein nahi duzun. Laboreak ereiteko errezeta berri hori Jokini emango zaio.
Egin eskema bat eta adierazi nola geratuko den Jokinen lursaila, proposamen horren arabera.
Sortu txosten bat testu-prozesadorean, eta zehaztu lursailaren zein zatitan erein behar den espezie bakoitza. Interneten
aurkitu badituzu, idatzi izen zientifikoak.
Lursail osoa ereinda geratuko den azaldu behar da txosten horretan. Erantzuna ezezkoa bada, zein zati geratu
da erein gabe?