Orientabideak
1. JARDUERA: ZATIKIAK AZTERTZEN. (SAIO BAT)
Ikasleak jardueran murgiltzeko, diapositiba-aurkezpen bat proposatzen da, zatikiak, haien sailkapenak eta
adierazpenak, eta haiei buruzko ideiak jaso ditzaten. Garrantzitsua da jarduna gidatzea eta koordinatzea; izan ere, irakasleen
eta ikasleen arteko elkarrekintzaren bitartez zatikien kontzeptuetara hurbiltzea da asmoa, eta ez ikasleek era autonomoan
egitea.
Jasotako informazioarekin txosten bat prestatu beharko dute, testu-prozesadorean, zatikiaren esanahia,
zatikien gaien izenak, motak eta adibideak azalduz. Garrantzitsua da ikasleen eta irakaslearen arteko bateratze-lana, sor
litezkeen akatsak zuzentzearren.
1. jarduera.
2. JARDUERA. LURSAILA ZATITZEN. (SAIO BAT)
Aurreko saioan bereganatutako kontzeptuak erabiliz, problema bat ebatzi beharko dute ikasleek: lursail
bat zatitu beharko dute, hiru labore mota ereiteko. Ariketa hau ebazteko, geometria edo marrazteko softwarea erabiltzea gomendatzen
da (Geogebra edo Draw, hurrenez hurren) landu beharreko lursailaren eskema egiteko. Problemak zehazten du lursailaren
zein zati hartuko duen labore bakoitzak; ez, ordea, nola banatu. Beraz, lur zatien diseinuari buruzko arrazoiak eman beharko
dira.
Helburua ez denez zuzenki bat zati berdinetan banatzea, komeni da zailtasunik ez jartzea. Hortaz, garrantzitsua
da, softwarea erabilerraza izatea ikasleentzat; Draw erabiltzea gomendatzen da. Horrez gain, lursailak beste dimentsio batzuk
izatea ere plantea dezake irakasleak, zuzenki bat zati kongruentetan banatzeko estrategiak lantzeko.
Problemak ebaztean, zatiki baliokidearen kontzeptua erabili beharko dute ikasleek. Nahiz eta jardueran
problema ebaztea planteatzen zaien ikasleei, zatiki baliokidearen kontzeptua baliatu behar dutenez, irakasleak erabakiko du
noiz jabetuko diren zatiki kontzeptu horretaz: problema ebatzi aurretik edo problema ebatzi bitartean. Halaber, zatikien arteko
batuketa zein kenketaren kontzeptuak ere modu intutiboan sartu nahi dira.
Jarduera honetan zatikien eta zenbaki hamartarren arteko lotura jorratzea ere planteatzen da; horretarako,
laguntza-tutoriala aurkeztuko zaie, eta ondoren, jarduerako zatikiak zenbaki hamartarretan adierazteko eskatuko zaie.
Jardueraren bukaeran ikasleek erabaki beharko dute lursaila nola zatitu. 5 labore aukeratu eta labore
bakoitza lursailaren zein zatitan erein adierazi beharko dute; ondoren, eskema bat egingo dute, hori azaltzeko.
Jarduera osagarri gisa, laboreen izen zientifikoak iker ditzakete ikasleek. Lana lehenago bukatu dutenei
proposa dakieke jarduera hori; gainera, horrela, ikastaldearen aniztasuna aintzat hartzen dugu. Bestalde, jarduera osagarria
ez denez matematikaren arlokoa, egin gabe ere gera daiteke.
2. jarduera.
3. JARDUERA. ZATIKIEI BURUZ GEHIAGO IKASTEN. (SAIO BAT)
Ikasleek beste problema bat ebatzi beharko dute aurreko saioetan landutako kontzeptuak erabiliz.
Proposatutako problema hau zailagoa da; izan ere, zatiki baten zatikia zer den eskemen bitartez landu
nahi da. Kontzeptu hori erabilgarria izango da ondorengo ikasgaietan; zatikien arteko biderketa azaltzeko, alegia.
Irakasleak ikasleak bideratu beharko ditu lursailaren zatiketa egin behar dutenean, eta alde egokia aukeratzen
lagunduko die. Halaber, taldean kontzeptu berriei (beste zatiki baten zatikia) buruzko eztabaida egin beharko dute, eta emaitzak
zatiki baliokideen bidez nola adierazi ere aztertu beharko dute.
Baliabideen atalean bi animazio interesgarri proposatzen dira, jardueran zehar jorratutako edukiak eta
lana indartzeko. Nahi izanez gero, ADEa erabiliz ere aurkez daitezke:
3. jarduera.