Iturria: http://www.viajesmag.com

Gure eskuetara iritsi baino lehen, erosi ohi ditugun produktuek ibilbide luzea egiten dute.

Hausnartu, esaterako, patata frijituen poltsa bati buruz. Hasteko, nekazari batek lurra landu behar du, patatak ereiteko. Ondoren, fabrika batera eramaten dira, eta han, patatak zuritu, ebaki, frijitu eta kimikoki tratatzen dituzte. Azkenik, poltsetan sartu eta gure herri eta hirietako supermerkatuetara eta dendetara eramaten dituzte, guk erosteko.

Patata frijituak ez lirateke gure eskuetara (eta gure urdailera!) iritsiko, hirugarren sektorearengatik ez balitz. Hirugarren sektoreak hainbat produktu eta zerbitzu eskaintzen die pertsonei eta enpresei.

Atal honetako jarduerei esker, hirugarren sektoreak gure bizitzan zer-nolako garrantzia duen ohartuko zarete. Zuen hiri edo herriko hainbat denda eta zerbitzu ikusiko dituzue, eta informazio-audiogida bat prestatuko duzue.

Prest? Has gaitezen!

http://es.wikipedia.org webgunetik hartutako irudia

Lehenago ikasgelan egindako jardueretan lehen eta bigarren sektoreen berri izan duzue.

Lehen sektorekoak dira naturaren baliabideak ustiatzen dituzten hainbat jarduera; besteak beste, nekazaritza, arrantza eta meatzaritza.

Bigarren sektorean, ostera, lehengaiak kontsumorako produktu bihurtzen dira. Sektore horrek buztinetik loreontzi ederra egiten du, laranjetatik zuku gozoa, eta metaletik lanerako tresnak.

Hirugarren sektorean, edo zerbitzuen sektorean, gainerako jarduera ekonomiko guztiak daude; alegia, lehen eta bigarren sektoreetan ez daudenak. Sektore horretako jarduerak askotarikoak dira; besteak beste, garraioa, hezkuntza, osasuna, turismoa, etab.

Hirugarren sektorea funtsezkoa da gure bizimodurako. Egunero-egunero, ohartu gabe sektore horren inguruan gaude: janaria erostean, eskolara joatean, telebista ikustean, trenean goazenean...

Hirugarren sektorerik gabe, gure bizimodua oso bestelakoa izango litzateke. Herrialde pobreetan, esaterako, haur askok ezin du eskolara joan. Eta familia askok jatekoa merkatuan erosi beharrean, lurrak landu edo abereak zaindu behar ditu, elikagaiak lortzeko.

Iturria: http://en.wikipedia.org

Lehenengo jardueran, hirugarren sektoreak gure bizimoduan zer-nolako garrantzia duen ikusi duzue.

Gaur egungo hiriak hirugarren sektoreari esker existitzen dira. Izan ere, hirugarren sektorerik egongo ez balitz, mendialdean edo itsasotik gertu eta askoz herri txikiagoetan bizi beharko genuke, jatekoa lortu eta bizitzeko, janari-dendarik eta garraiobiderik ez litzatekeelako egongo.

Gure herrialdeko edozein herri eta hiritan, gizon-emakumeon bizimodua errazten duen zerbitzu ugari dago: ospitaleak, dendak, eskolak, etab.

Hirugarren sektoreko zerbitzuak publikoak edo pribatuak dira.

Zerbitzu publikoak administrazio-arlokoak dira: udaletxeetakoak, autonomia-erkidegoetakoak eta estatukoak. Esate baterako: suhiltzaile-parkeak, polizia-etxeak eta postetxeak.

Zerbitzu pribatuak enpresa edo pertsona batek egiten dituenak dira; besteak beste, okindegiak, supermerkatuak, jantzi-dendak, etab.

Zenbait kasutan, ordea, zerbitzu bera publikoa eta pribatua izan daiteke. Ospitaleak publikoak dira, baina badira ospitale pribatuak ere.

Sant Pauko ospitalea, Bartzelona

Iturria: http://en.wikipedia.org

Iturria: Woices

Aurreko jardueran landutako informazioa erabiltzeko unea iritsi da, audiogida bat grabatu eta argitaratuko baituzue orain. Horretarako, Woices aplikazioa erabiliko duzue.

Ez ahaztu hitz egiteko eta adierazteko modua oso garrantzitsuak direla, bideoan den-dena erregistratuta geldituko baita, eta era berean, irudietan ikusiko ez bada ere, gorputz-hizkuntza zaindu behar duzuela.

Gogoratu informazioa zuen eskualdean bizi ez direnentzat dela, eta beraz, ez dituztela zuen lokalismoak ezagutzen (eskualde jakin bateko hitz edo adierazpenak). Hortaz, ez erabili horrelakorik.

Hitz egin lasai eta ongi ahoskatuz. Grabaketa amaitu baino lehen, entzun arretaz eta pentsatu ea aldaketarik egin behar den.

Gogoratu: jarduera hau egiteko mikrofonoa behar duzue.