Orientabideak

Erantzunak

1. jarduera: Euroari buruzko informazioaren bila (saio bat)

Jasotako informazioaren araberakoak izan badaitezke ere, gutxi gorabehera, erantzun hauek emango dituzte ikasleek:

• Zer da Europar Batasuna?

EB Europako ia herrialde guztiek osatzen duten elkartea da eta helburu hauek ditu: bidezkoa eta solidarioa izatea; estatu kideen aurrerapena eta egonkortasun ekonomikoa sustatzea; lanpostuak sortzea; eta langileak gaitu. Munduko potentzia komertzialik handiena da. Herrialde atzeratuei lagundu, aurrerapen demokratikoa bultzatu eta giza eskubideak EBn nahiz EBtik kanpo defendatzen ditu.

• Zenbat estatuk osatzen dute gaur egun Europar Batasuna? Zein dira?

Gaur egun, 27 estatuk osatzen dute EB. Hona hemen: Belgika, Alemania, Frantzia, Italia, Luxenburgo, Herbehereak, Danimarka, Britainia Handia, Grezia, Espainia, Portugal, Austria, Finlandia, Suedia, Txekia, Estonia, Zipre, Letonia, Lituania, Hungaria, Malta, Polonia, Eslovenia, Eslovakia, Bulgaria, Errumania eta Irlanda.

• Estatu kopuru bera izan al du beti Europar Batasunak? Aipatu zer estatuk osatu zuten Europar Batasuna hasiera batean.

Egungo hogeita zazpi estatu kideetatik, seik soilik osatu zuten hasiera batean EB. Hauek izan ziren estatu sortzaileak: Belgika, Alemania, Frantzia, Italia, Luxenburgo eta Herbehereak.

• Zer herrialdek adierazi dute EBn sartzeko asmoa?

EBn sartzea eskatu duten herrialdeak, hau da, EBko estatu kide izateko gai direnak, hauek ditugu: Turkia, Kroazia eta Jugoslaviaren parte izan zen Mazedonia.

Atal honen erantzuna hau da:

Azkenean, galdetegian azaldutako zalantzak ariketa bukatu ondoren argituko dira.

Orientabideak

Erantzunak

2. jarduera: Problemak ebazten (saio bat)

1. ataleko ariketa erantzun irekikoa da.

2. eta 3. atalak:

• Problema honen helburua hauxe da: ikasleak ohartu daitezela, aurreneko hiru lerroetako zifrak idaztean, laukietan idatzitako zifrak eskatutako kopuruaren beraren zifrak direla. Alderdi hori azter dezatela proposatuko du irakasleak, taula osatu ondoren.

Ikasleekin aztertu beharreko beste gai bat da kopuruak nolabaiteko informazio ematen duela. Hau da, zenbaki baten idazkerak zer informazio ematen duen ulertzen ikasleek aurrera egitea lortu nahi da. Esaterako, 398 zenbakiari erreparatuta soilik berehala konturatu daitezke zenbaki horren deskonposizio bat hau izan daitekeela: 3x100 + 9x10 + 8x1. Esan bezala, deskonposizio hori egiteko gai izango da zenbakiak daraman informazioa interpretatzen dakiena; eta norbait deskonposizioa egiteko gai ez bada, interpretazio hori egiten ikasi ez duelako izango da.

Oinarrizko erlazio horiek ezagutzea funtsezkoa izango da laugarren lerrotik aurrera agertuko diren beste erlazio zailago batzuk ulertzeko. Izan ere, oinarrizko erlazio horiek ondoz ondoko balioen arteko erlazioei eragiten diete. Adibidez, 15x100 + 3x10 + 8x1. Eta ikasleek, hain zuzen ere, azterketa hori egiten hasi behar dute laugarren lerrotik aurrera.

Lehenengo hiru lerroak bete ondoren, beraz, ikasleak honetaz ohartuko dira: gure zenbaki-sisteman, hamarreko batek 10 bateko balio du, ehuneko batek 100… Laugarren lerrotik aurrera, posizioaren araberako balioak landuko dituzte: 1.000ko bat 100eko 10 dira, 100eko bat 10eko 10, etab.

Eskatutako kopuruak	100 €-ko billeteak	10 €-ko billeteak	1 €-eko txanponak
398 €	3	9	8
360 €	3	6	0
204 €	2	0	4
1.538 €	15	3	8
3.207 €	32	0	7
3.270 €	32	7	0
2.730 €	27	3	0
7.203 €	72	0	3

• Problema honetan, aurreko ariketaren bigarren zatian aztertutako erlazioak landu beharko dituzte berriz ere, eta orain, gainera, beste zailtasun bat izango dute, 10 €-ko billeterik ezin baitute erabili. Beraz, zifrak binaka elkartu beharko dituzte, honela, adibidez: 32x100 + 41x1. Deskonposizio hori egiteko, baliokidetasun hauek garbi izan beharko dituzte: 1.000ko 3 eta 100eko 30 baliokideak dira, bai eta 10eko 4 eta 40ko 1 ere. Azken finean, ikasleak konturatu daitezke ezkerreko bi zifrek 100 €-ko zenbat billete behar diren adierazten dutela, eta eskuineko biek, berriz, 1 €-eko zenbat txanpon behar diren. Ikasleak, normalean, ez dira berehala ohartzen arau horien eta biderketaren arteko loturaz (100eko 32 honen baliokidea da: 32x100 = 3.200), eta problema hau aitzakia izan daiteke gaia sakon lantzeko. Beste hitz batzuetan, kopuru bakoitzaren deskonposizioa eragiketa bakarraren bidez adierazten ikasi beharko dute.

• Aurreko problemako ohar berberak.

• Ikasleek aldez aurretik jakin behar dute igeltseroak egunero ez zuela ordu kopuru bera lan egin; lehenengoan, 5 ordu lan egin zuen; bigarrenean, 7; eta hirugarrenean, 8 (5 + 7- 4 = 8). Hiru egunetan, beraz, 20 ordu lan egin zuen (5 + 7 + 8). 20 orduen truke 420 € kobratu baditu, hauxe egin beharko dute orduko zenbat kobratu duen jakiteko: 420:20 = 21. 21 € kobratu zituen orduko.

Antzeko arrazoiketa eginez:

1. Ebazteko bide bat baino gehiago daude. Hona hemen bat: 875:125 = 7 (txartel bakoitzaren prezioa), 875 – 532 = 343 (joan ez ziren pertsonei dagokiena), 343:7 = 49 (agertu ez ziren pertsonen kopurua, hau da, besaulki hutsena). Erantzuna: txartel batek 7 € balio du. Hutsik 49 besaulki zeuden.

2. 15 x 6 x 2 (joan-etorria) + 15 x 8 = 180 + 120 = 300. Erantzuna: Txartel guztien kostua 300 € da.

3. 1.250:25 = 50 (1.250 m hari lortzeko behar diren 25 m-ko matazak), 50 x 12 = 600 (50 matazen kostua). Erantzuna: 50 mataza beharko ditu. 600 € ordaindu beharko du.

4. 699:15,89 = 43,9899… Zatiketa horren hondarra 0 ez denez, emaitza 43tik 44ra artekoa izango dela zehaztu daiteke, eta, beraz, 44 astetan aurreztu beharko dut. Izan ere, 43tan egiten badut, ez dut nahikoa diru izango. Erantzuna: 44 aste pasa ondoren erosi ahal izango dut ordenagailua.

5. 5,2 + 3,27 + 2,79 +8,46 + 6,28 = 26 (metroak), 26 x 14 = 364 (erosketaren zenbatekoa). Erantzuna: 26 metro oihal erosi zituen eta 364 € ordaindu zituen.

6. 3 x 2 + 2 x 1 + 5 x 0,20 = 6 + 2 + 1 = 9. Erantzuna: 9 € zituen guztira.

Orientabideak

Erantzunak

3. jarduera: Munduko moneta-sistemak (saio bat)

Ikasleek, lehenengo atalean, diapositibetan ageri diren baliokidetasunak kontuan izan beharko dituzte:

1 USD ($) = 0,76 EUR (€)

1 GBP (£) = 1,21561 EUR (€)

1 EUR (€) = 108,71 JPY (¥)

1 EUR = 8,6816 CNY

Ondoren, binaka jarri eta zein herrialdetara bidaiatu nahi duten erabaki beharko dute. Herrialdea aukeratu eta gero, bidaiaren elementu bakoitzaren kostua jakiteko kalkuluak egingo dituzte. Aurkezpenean datozen truke-balioetan oinarrituta, kalkuluen emaitzak hauek dira:

Gastuak	Guztizkoaren %	Gastuak dolarretan	Gastuak liberatan	Gastuak yenetan	Gastuak yuanetan	Gastuak eurotan
Hotela	% 20	456	729,372	65.226	5.208,96	600
Jatekoa	% 30	684	1.094,058	97.839	7.813,44	900
Garraioa	% 15	342	547,029	48.919,5	3.906,72	450
Museoak, erakusketak, parkeak, etab.	% 15	342	547,029	48.919,5	3.906,72	450
Gastu eta erosketa pertsonalak	% 10	228	364,686	32.613	2.604,48	300
Bestelakoak	% 10	228	364,686	32.613	2.604,48	300
Guztira	% 100	2.280	3.646,86	326.130	26.044,8	3.000

Baina esan bezala, beste aukera bat da ikasleek jarduera egiten ari diren eguneko truke-balioak lortzea eta taula horien arabera betetzea. Horrela, bukaeran bi taulak konpara litezke, eta truke-balioen eboluzioa zein den jakin.

Azkeneko atalean, baliokidetasun horiek erabili beharko dituzte planteatutako egoerak ebazteko:

• Zuen herrian zinemako txartel batek, batez beste, 6 € balio badu, eta Ingalaterrako merkeenak 5 £ , azkeneko kopuru horren balioa eurotan kalkulatu beharko dute: 1,21561x5 = 6,2805. Horrenbestez, zinemara joateak bi herrialdeetan antzera balio duela ondorioztatu beharko dute. Argi dago Ingalaterrako 10 £-ko (12,1561 €) txartela gure herrikoa baino garestiagoa dela, geurean txartelek 9 € balio baitute gehienez.

• Hona hemen egoera ebazteko bide bat: 1 EUR (€) = 8,6816 CNY (¥) baliokidetasuna aplikatu eta ondorio bat atera beharko lukete ikasleek (baliokidetasuneko bi monetak erlazionatu behar dituzte); hain zuzen ere, Txinan freskagarriak 1 € baino gutxiago balio duela ondorioztatu beharko lukete (1 €-en laurdena, gutxi gorabehera); hots, hau da freskagarriaren kostua: 2,24:8,6816 = 0,258 €. Baina ariketan kostua dolarretan lortzeko eskatzen denez, dolarren eta euroen arteko baliokidetasuna aplikatu eta beste kalkulu bat egin beharko dute. 1 USD ($) = 0,76 EUR (€) baliokidetasuna aplikatu eta Txinako freskagarriaren balioa €-tan (0,258) gutxi gorabehera dolar baten herena dela ikusiko dute (0,258 0,76ren herena da, gutxi gorabehera). Zehatz-mehatz: 0,258:0,76 = 0,3395. Freskagarriak, beraz, 0,34 USD ($) balio du. Zenbateko hori Espainiako batez besteko prezioa (0,44 €) baino txikiagoa da, eta beraz, freskagarria Txinan merkeagoa dela esan daiteke.

• 1 EUR (€) = 108,71 JPY (¥) baliokidetasuna aplikatu eta egunkari batek Japonian 1 € baino gutxiago balio duela lortu beharko dute ikasleek. Hauxe, gutxi gorabehera: 82,62:108,71 = 0,76 €. Hemen egunkarien prezioa 2 €-tik 3 €-ra bitartekoa denez, Japonian merkeagoak direla esan daiteke.

Orientabideak

Baliabideak

Testu-prozesadorea	Writer. OpenOffice.org aplikazio sortako testu-prozesadorea: http://eu.openoffice.org/
Kalkulu-orria	Calc. OpenOffice.org suiteko aplikazioetako kalkulu-orria, plataforma anitzetarakoa: http://eu.openoffice.org/
Beste aplikazio batzuk	Interneteko web-orriak eta informazioa bilatzeko tresna:http://www.google.es OpenOffice.org instalatzeko tutoriala:openofficeparawindows.pdf
Web-erreferentziak	Kobratu eta eman atzerakoak. Erabili ahalik eta pieza gutxien. Andaluziako Junta:http://www.juntadeandalucia.es/averroes/ceipcervantes/images/EnlacesTic2/Matematicasenlaces/euro/vende_1.htm Baliokidetasunak eta jokoak euroarekin. Andaluziako Junta: http://www.juntadeandalucia.es/averroes/recursos_informaticos/andared01/monedero/index.html Espainiako Gobernuaren Hezkuntza eta Zientzia ministerioaren webgunea (euroak eta zenbaki hamartarrak erlazionatzen dituen aplikazio bat du):http://www.isftic.mepsyd.es/w3/recursos/primaria/matematicas/indice.htm Europako Banku Zentralaren webgunea, hezkuntza-aplikazioak: http://www.ecb.int/euro/play/html/index.es.html Europar Batasunaren webgune ofiziala:http://www.europa.eu

Programazioa

IKT GAITASUN OROKORRAK ETA IKASMAILAKOAK*

* Lehen Hezkuntzako 5. mailako ikasleentzako “Eskola 2.0” proposamenaren IKT gaitasunerako itemak, eranskin honetatik hartuak: IKT gaitasunen mapa .

Bizitza osorako ikaskuntza

B1. Komunikatzea eta lankidetzan aritzea

• B1.1. Haien inguruarekiko gertuko arazo sinpleetarako irtenbideak identifikatu eta ebaluatzea, eta kontzeptuak argitzea ahalbidetzen duten lankidetzako IKT baliabideak erabiltzea

B2. Ingurune birtualetan moldatzea

• B2.1. Ingurune birtual bat maneiatzen hastea eta ingurune horietako oinarrizko eragiketak ikasteko gai izatea

B3. Informazioa kudeatu, sortu eta balioestea

• B3.5. Dagokion arloko oinarrizko prozedurak eta metodoak aplikatzea, heldu baten laguntzaz

B4. Sortzaileak izatea eta berritzea

• B4.2. Sormena, ikerketa eta berrikuntzaz baliatuz, beren produktuak (bideo-jokoak, aurkezpenak, gailuak) sortzea ahalbidetzen dieten IKT baliabideak erabiltzea, beren interesak betetzeko edo beste batzuek planteatutako arazoei irtenbidea emateko

B5. Mundu erreala ulertzea, arakatzea eta bertan moldatzea

• B5.1 Batez ere irudiak eta soinuak erabiliz eta heldu baten laguntzaz mundu errealeko gaiak arakatzea eta/edo benetako arazo txikiei heltzea ahalbidetzen duten IKT baliabideak erabiltzea

Trebetasun teknologikoa

T2. IKTak informazioa bilatu, aukeratu eta aztertzeko erabiltzea

• T2.1. Interneteko zerbitzuak erabiltzea (web-bilatzaileak eta beste hainbat) informazioa bilatzeko

T3. IKTak testu-informazioa prozesatzeko erabiltzea

• T3.1. Testu-prozesaketako oinarrizko eragiketak egitea (kopiatu eta itsastea; formatua, lerrokatzea eta orrikatzea zehaztea; irudiak txertatzea; tipografia eta tamaina aldatzea; dokumentuak artxibatu eta inprimatzea)

T5. IKTak multimedia-informazioa prozesatzeko erabiltzea

• T5.1. Multimedia edukiez oinarrizko eragiketak egitea (kopiatu eta itsastea; formatua zehaztea; irudi bat, soinu, bideoa txertatzea; webgune batetik irudi bat deskargatzea)

Herritartasun digitala

H2. Jabetza intelektuala balioestea

• H2.2. Informazioa erabiltzeari buruzko arauak errespetatzea, batez ere bideoen, audioaren, abestien eta monografien jabetza intelektualari dagokionez

• H2.3. Webean informazioa erabiltzeari buruzko hitzarmenak ezagutzea, egileei sinesgarritasuna ematearren eta iturriak egoki aipatzearren

Programazioa

IKASKETA-HELBURUAK

• Euroa zer herrialdek erabiltzen duten jakitea
• Euroko txanponak eta billeteak aztertzea.
• Euroaren berri izatea eta ordainketak egiteko euroa erabiltzen jakitea. Euroarekin loturiko kalkuluak egitea eta baliokidetasunak kalkulatzea
• Azalpen-testuak irakurtzea eta ulertzea
• Lexiko espezifikoa zehaztasunez erabiltzea
• Tresna informatikoak trebetasunez erabiltzea

EDUKIAK

• Euroa.
• Moneta-sistema erabiltzea: baliokidetasunak, eragiketak eta trukeak
• Problema errealak ebaztea
• Munduko moneta-sistema garrantzitsu batzuk

Programazioa

EBALUAZIO-IRIZPIDEAK

• Azalpen-testuak irakurri eta ulertzen ditu
• Definizio koherente eta lotuak lantzen ditu
• Beste moneta-sistema batzuetako kopuruak zehaztasunez adierazten ditu
• Moneta-sistemako zenbait kopuru eta unitate konparatu eta ordenatzen ditu
• Lankidetzan aritzen da
• Moneta-sistemako kopuruak biribiltzen ditu eguneroko bizitzarekin loturiko egoeretan

Oinarriak

Zer da sekuentzia didaktiko bat eta zer eskaintzen digu?

Sekuentzia didaktiko bat (SD) jarduera-segida ordenatu bat da, ikasleak gaitasun kurrikularrak zein IKT gaitasunak beregana ditzan diseinatua. Sekuentzia didaktikoetako atalik esanguratsuena elkarren artean lotutako jardueren segida da, ikasle orok jarraitu beharko baitio ikasketa-prozesuan. Funtzio eta ezaugarri ezberdinak dituzten jarduerak lantzeko aukera eskaintzen digu, modu integratuan. Edukia aurkeztea, ulertzea, erabiltzea edo praktikatzea prozesuaren ezinbesteko osagaiak dira, eta elkarri lotutako edukien multzo esanguratsu baten inguruan lan egiteko aukera ematen dute.

Chaval Brasilen argazki bat, Flickr webgunean, CC lizentziapean.

Hainbat jarduera egin daitezke, proposatutako jarduera-segidari jarraituz, edo horietako batzuk aukeratu eta norberaren sekuentziara egokitu.

Jardueretan zehar sortutako planteamenduek garatu egin nahi dituzte Lehen Hezkuntzarako Oinarrizko Gaitasunak (hizkuntza-komunikaziorakoa, matematikarakoa, mundu fisikoaren ezagutza eta harekiko elkarrekintzarakoa, gizarte- eta hiritar-gaitasuna, ikasten ikastekoa, eta norberaren autonomia eta ekimenerakoa) eta IKT gaitasunak (Eskola 2.0 proposamenean txertatutako ikasleen IKT gaitasunen maparen arabera).

Jarduerak, orokorrean, 2.0 baliabide digitalen erabileran eta sareko lanean oinarritzen dira. Horrenbestez, egindako proposamenetan ikasleak animatuko dira hainbat sare sozialetan informazioa kudea eta argitara dezaten, lankidetzan ari daitezen, eta, eskuratutako informazioa baloratzean, jarrera kritikoa zein hausnarkorra gara dezaten . Aldi berean, gune birtualetan adostutako arauak ezagutzeko eta aintzat hartzeko aukera izango dute.

Fundamentación

Sekuentzia didaktikoen xedea eta egitura

Sekuentzia didaktikoen xedea da ikasleek eduki kurrikularrak ikastea eta gaitasun digitalak eskuratzea, IKTak ikasgelan aplikatzeko proposamen batetik abiatuta.

Ikasleek sekuentziako edukietan aurrera egingo dute etapaz etapa. Banaka egingo dute, baina taldeka egiteko jarduerak proposatuko zaizkie. Etapa bakoitzean adierazi egingo zaie zer egin behar duten eta zer baliabide erabili behar dituzten. Sekuentziek ikasleei eskaintzen dizkiete:

• Hiru jarduerako edo gehiagoko segida bat, eduki kurrikularrei heltzeko, Lehen Hezkuntzako 5. mailako ikasleei zuzendutako aginduekin
• Fitxategi erantsiak, jarduerak egiteko eta koebaluatzeko edo autoebaluatzeko
• Ikasleentzako tutorialak, erabiliko diren programei edo web 2.0 zerbitzuei buruzkoak
• Sekuentziako IKT baliabide guztiak biltzen dituen atal bat

Landuko den edukiaren arabera, hauek eskainiko dituzte:

• Jarduerak egiteko erabiliko diren webguneetara, animazioetara eta bideoetara estekak
• Ebazteko jarduera elkarreragileak

Sekuentziako irakasleentzako gidaren helburu nagusia da irakasleei proposatutako ikasketa-segida planifikatzen eta praktikan jartzen laguntzea. Premisa horiek kontuan hartuta, gidek irakasleei eskaintzen dizkiete:

• Proposamen didaktikoaren testuingurua.
• Orientabide didaktikoak, ADEren metodologia erabiliz sekuentzia didaktikoak lantzeko.
• Proposatutako jardueren erantzunak.
• Oinarrizko gaitasunak eta arloaren berariazko gaitasunak.
• IKT gaitasunak (Lehen Hezkuntzako 5. mailako ikasleentzako “Eskola 2.0” proposamenean ezarritakoak).
• Ikasketa-helburuak, edukiak eta ebakuazio-irizpideak.
• Proposamenean erabiliko diren materialak eta IKT baliabideak.
• Prestakuntza-eduki osagarriak, irakasleei sekuentzia didaktikoak garatzen laguntzeko (ADE, web 2.0 tresnak eta e-learning plataformak).

Oinarriak

Ebaluazioa

Ebaluazioak, burututako sekuentzien emaitzak aztertzeko tresna ez ezik, ikasketa-prozesua erregulatzekoa ere izan behar du. Horregatik, sekuentzia didaktikoan txertatuta egon behar du, prozesuan landuko diren jardueren parte izan. Jarduera horiek hausnarketa egiteko aukera eman behar diote ikasleari, egiten ari denaz, izan dituen zailtasunez, egin dituen akatsez, behar duen laguntzaz, eta hobetzeko eta aurrera egiteko bideez.

Ebaluazio hori hausnarketa-ariketa da, aurretiko ezagutzak prozesuan ikasten ari denarekin lotzeko aukera ematen duena. Akatsak abiapuntu gisa hartzen ditu, zailtasunez jabetzeko eta aurre haiei egiteko. Helburua ez da ikasleek zer ez dakiten jasotzea; jakitea baizik ezaguerak nola aplikatzen dituzten, informazioa nola lotzen duten, konponbideak bilatzeko trebetasunak nola aktibatzen dituzten... Ebaluazio horrek irizpide, adierazle eta ikasketa-helburu zehatzen multzo zabal bat izan behar du oinarrian, ez zenbakizko kalifikazio soil bat.

Gaitasunetan oinarritutako ebaluazioak lehenetsi egiten ditu ulertzea, aztertzea, lantzea, justifikatzea eta erantzunak argudiatzea, eta ez informazioa buruz ikastea eta errepikatzea.

Proposatutako jarduerak, nahiz azterketa-, koebaluazio- eta autoebaluazio-tresnak irakasleen erreferenteak dira, ikasleen ikasketa-prozesua nahiz haiek lortutako emaitzak baloratzeko.

Oinarriak

Materialaren aurkezpena eta deskarga

Sekuentzia didaktiko bakoitzak, ZIP fitxategi bat deskargatzeko atal bat dauka. Material deskargagarria.

Lotura hori aukeratzean ZIP fitxategi konprimitu bat deskargatzen da:

Gorde fitxategia botoian klik egingo dugu fitxategia gure ordenagailuan deskargatzeko. Behin ordenagailuan izanda, bi klik egingo ditugu fitxategiaren gainean, deskonprimitzeko programarekin ireki eta edukia ikusteko:

Landuko dugun materiala non gorde zehaztuko dugu eta karpetak bertara aterako.

Behin materiala deskonprimituta, karpeta zabaldu eta hiru karpeta ikusiko ditugu:

1. Sekuentziaren edukia: Ikasl_sekuentzia

2. Estiloarekin ikusteko behar diren artxiboak: Zz_programa

3. Imsmanifest.xml fitxategi bat, Moodle-ek edo antzeko plataforma batek prozesatzeko informazioa duena. Bertan, ikastaroaren edukiak zuzen azalduko zaizkio erabiltzaileari, dagokion balio pedagogikoa erantsita.

Oinarriak

Zer dago karpeta bakoitzean eta zertarako balio du?

Ikasl_sekuentzia

Sekuentzia guztiek dute Ikasl_sekuentzia izeneko karpeta bat.

• Sekuentzia ikusteko lehen urratsa “index” fitxategia zabaltzea da eta sekuentzia guztian zehar nabigatzea.
• Moduluen karpetan hizkuntza direktorio bat dago. Guk “eu” karpeta ikusiko dugu, bertan baitago euskarazko bertsioa.

• Karpeta barruan sekuentziaren .html fitxategi guztiak daude zenbakiz ordenatuta. Edozein eduki argitaratu nahi badugu, Dreamweaver (jabedun softwarea) edo Kompozer (software librea) erabil dezakegu.

• “01modulua_p.html” fitxategia inprimatzeko bertsioari dagokio.
• Materialen karpetan “img” karpeta nabarmentzen da, bertan baitaude sekuentziako irudi guztiak. Baten bat gehitu nahi bada, nahikoa da karpetan txertatzea eta dagokion html lotura egitea.
• Modu berean, materiala ere txerta daiteke deskargen (fitxategi konprimituak), .swf fitxategien (eskuliburu eta animazioak) eta inprimatzekoen karpetetan; bertan, materialaren .odt bertsioa dago, editatu eta .pdf formatura esportatu ahal izateko.

Zz_programa karpeta

Ondoren zz_programa karpetan sartuko gara, bertan baitaude sekuentzia ohiko estiloan bistaratzeko behar diren fitxategi guztiak.

Karpeta hori egituratik kanpo mugitzen badugu, materiala modu honetan ikusiko dugu:

Imsmanifest

“js” karpetak eta imsmanifest.xml fitxategiak ikasketarako plataforma birtualetako nabigatzaileei dagozkie, eta beraz, ez da komeni haiek editatzea.