Hainbat jarduera proposatzen dizkizuegu, ebatzi eta ondorioak atera ditzazuen.

Ebatzi jarduera hauek, eta gorde erantzunak eta horien justifikazioak testu-prozesadorearen bidez.

• Ikaskide batekin batera, proposatu zatiketa bat, zatitzailea 45 eta hondarra 12 dituena.

• Begiratu aurreko ataleko erantzuna, eta erantzun galderei: Zatiketa bakarra al dago? Zenbat daude? Zergatik?

• Aurreko bi atalak oinarri hartuta, erantzun: Egia al da lor ditzakegun zatikizun guztien azken zifra 7 edo 2 izango dela? Zergatik?

• Erreparatu aurreko hiru erantzunei: Aurkitu al ditzakezue zatidura bat eta 1.000 baino handiagoa den zatikizun bat? 1.000 baino handiagoak diren zatikizun horien artean, zein da txikiena? Zatiketa batean, zatikizuna 45 eta zatidura 11 badira, zein da zatitzailea? Eta hondarra?

• Zatiketa batean, zatikizuna 45 eta zatidura 1 badira, zein da zatitzailea? Eta zatidura? Berrikusi erantzunak eta pentsatu beste erantzunen bat egon daitekeen. Hala bada, idatzi aurkitu dituzuen guztiak.

• Zatiketa batean, izan al daitezke zatikizuna 32, zatidura 12 eta hondarra 1? Zergatik?

• Jarduera horiek guztiak egin ondoren, lor al dezakezue zatiketa baten gaiak (zatikizuna, zatitzailea, zatidura eta hondarra) lotzen dituen formularik? Badakizue zatiketa zehatz batean, zatitzailea zatiduraz biderkatzean zatikizuna lortzen dela: Ba al dago antzeko formularik zatiketa osoetan?

• Ebatzi jarduera hauek:

Kontuan hartu:

12 x 10 = 120

12 x 100 = 1.200

12 x 1.000 = 12.000

12 x 10.000 = 120.000

Erabaki:

• 130:12, 10 baino handiagoa, txikiagoa ala berdina den.

• 1.000:12, 100 baino handiagoa, txikiagoa ala berdina den.

• 11.719:12, 1.000 baino handiagoa, txikiagoa ala berdina den.

• 162.985:12, 10.000 baino handiagoa, txikiagoa ala berdina den.

Idatzi erantzunak testu-prozesadorean, ala justifikatu.

• Ondoren, erantzun zenbaki arrunten kalkuluan hurbilketarekin lotuta dauden planteamendu hauei:

Ebatzi jarduerak eta gorde erantzunak testu-prozesadorean.

• Jonek, kalkulagailuz 15:2 egitean, 7,5 lortu zuen. Gero, 15:4 egin eta 3,75 lortu zuen. Azkenik, 15:8 egin eta 1,875 lortu zuen. Emaitza horietatik abiatuz, nola lortuko zenukete zatiketa bakoitzaren hondarra kalkulagailua erabiliz? Azaldu prozedura eta egiaztatu eragiketak, prozedurak balio duela segurtatzeko. Prozedura hori erabiliz, kalkulatu 5.425:16 zatiketaren hondarra, kalkulagailua erabiliz 339,0625 emaitza lortu dela jakinik.